Wara Fa'ana Laka Zikrak -(2)

Bulaya Jab Shabe Asra Ba Sooe Arshe Ulaa
Ba Shauqe Deede Muhammad Khuda Bhi Muztar Tha
Huzoor Pohonche To Aizaaz Rab Ne Ye Baqsha
Bitha Ke Saamne Be Saaqta Ye Farmaya
Kyunke Hai Surat -O- Ausaaf Me Sab Se Aala
Kardiya Hamne Tera Zikr Buland -O- Baala.

Wara Fa'ana Laka Zikrak
Ya Habeebi Ya Muhammad. (x8)

Lauhe Mehfooz Pe Likh'khe Hain Qaseede Tere
Farsh Se Arsh Talak Aam Hain Charche Tere
Wirde Maqlooq Hain Har Daur Me Qisse Tere
Aasman Waale Bhi Hain Chaahne Waale Tere.
Khush Hain Khudsi Bhi Tere Naam Ki Japkar Mala
Kardiya Hamne Tera Zikr Buland -O- Baala.

Sooe Aflaak Tera Dekhna Hamne Dekha
Muddua Tera Ke Kaaba Ho Tumhara Qibla
Hamne Kardala Usi Aan Jo Tumne Chaaha
Sooe Aflaak Jo The Rukh Mudgaye Sooe Kaaba
Tu Bata Teri Kisi Baat Ko Ab Tak Taala
Kardiya Hamne Tera Zikr Buland -O- Baala.

Mere Mehboob Meri Raah Me Uthne Waale
Sab Khazane Hain Tere Pyaar Me Lutne Waale
Ham Tere Saath The Aye Ghaar Me Chupne Waale
Rukgaye Aake Dare Ghaar Pe Rukne Waale
Makdiyan Taan Gayin Ghaar Ke Dar Par Jaala
Kardiya Hamne Tera Zikr Buland -O- Baala.

Teri Hikmath Ka Sana Khwan Hai Hajre Aswad
Teri Hi Baat Kiye Jaati Hai Umme Ma'awad
Muntazir Tere Liye The Tere Jadde Amjad
Hamne Bheja Hai Banakar Tumhe Sab Par Shahid
Jalsa -E- Arzo Sama Hai Tera Dekha Bhaala
Kardiya Hamne Tera Zikr Buland -O- Baala.

Shikme Maahi Me Mujhe Dhoond Raha Tha Koi
Aag Me Mere Liye Kood Gaya Tha Koi
Meri Khaatir Sare Bazaar Bika Tha Koi
Ek Tajalli Se Sare Toor Gira Tha Koi
Tu Magar Arsh Pe Aakar Mujhe Milne Waala
Kardiya Hamne Tera Zikr Buland -O- Baala.

Teri Shaanon Pe Latakte Wo Mu'attar Gesu
Rukhe Purnoor Ki Zeenath Wo Tumhare Abroo
Sabko Lagti Hai Bhali Tere Badan Ki Khushboo
Teri Guftaar Tera Khulq Sarapa Jadoo
Khoob Sajta Hai Tujhe Tera Wo Kambal Kaala
Kardiya Hamne Tera Zikr Buland -O- Baala.

Ki Mere Naam Ki Har Samt Manadi Tumne
Zulmate Kufr Ki Deewar Giraadi Tumne
Ahle Taif Ko Sitham Sehke Dua Di Tumne
Zulm Par Rehm Ki Chadar Si Chadha Di Tumne
Hashr Tak Koi Bhi Tumsa Nahi Aane Waala
Kardiya Hamne Tera Zikr Buland -O- Baala.

Ahle Makkah Ke Mazalim Tujhe Sehte Dekha
Hamne Taif Me Tere Khoon Ko Behte Dekha
Bharke Fariyad Kabhi Tujhko Na Kehte Dekha
Waqte Dushwar Bhi Shaakil Tujhe Rehte Dekha
Hamne Bhi Teri Issi Rasme Wafa Ko Paala
Kardiya Hamne Tera Zikr Buland -O- Baala.

Ki Tere Pyaar Me Ye Bazm Ujagar Hamne
Tere Seene Ko Kiya Khoob Munawaar Hamne
Kardiya Tere Liye Ghaib Ko Azhar Hamne
Khoob Dikhlaye Tujhe Arsh Ke Manzar Hamne
Khulgaya Tere Liye Sirre Nihaan Ka Taala
Kardiya Hamne Tera Zikr Buland -O- Baala.

Log Aate Hain Mere Hukm Se Mere Ghar Par
Khud Ba Khud Shouq Se Jaate Hain Tumhare Dar Par
Afzal -Ul- Khalq Ka Sehra Hai Tumhare Sar Par
Tera Hi Sikka Hai Har Daur Me Behrobar Par
Dabdaba Tera Bohot Martaba Tera Aala
Kardiya Hamne Tera Zikr Buland -O- Baala.

Rodiya Khushk Tana Khoke Sahara Tera
Chand Shak Hogaya Paate Hi Ishaara Tera
Hai Mere Izn Se Har Shai Pe Ijaara Tera
Jau Ki Roti Pe Raha Phir Bhi Guzaara Tera
Bangaye Tere Sage Dar Bhi Janabe Waala
Kardiya Hamne Tera Zikr Buland -O- Baala.

Tu Faqat Ek Zamane Me Nahi Hai Mehdood
Hai Mera Zikr Jahan Tu Bhi Wahin Hai Maujood
Itteba Teri Hui Hasilo Maqsoode Sujood
Tujhpe Hai Khaliq -O- Maqlooq Ke Ta Hashr Durood
Abd Ke Dil Me Tera Pyaar Bhi Ham Ne Daala
Kardiya Hamne Tera Zikr Buland -O- Baala.