Aqse Rooe Mustafa Se Aisi Zebaayi Mili

Kalaam of Peer Naseer Uddin Naseer

Aqse Rooe Mustafa Se Aisi Zebaayi Mili
Khil Utha Range Chaman Phoolon Ko Ranaayi Mili.

Sabz Gumbad Ke Manazir Dekhta Rehta Hoon Mai
Ishq Me Chashme Tasawwur Khube Gehrayi Mili.

Jis Taraf Uthi Nigahen Mehfile Kaunain Me
Rehmatullil Aalamin Ki Jalwa Farmaayi Mili.

Gar Madine Me Mayassar Aagayi Do Gaz Zameen
Phir Hamare Muntashir Ajza Ko Yakjaayi Mili.

Allah Allah Ye Nigahe Mustafa Ka Maujza
Sangreze Bol Uthe Unko Goyaai Mili.

Aapke Husne Karam Se Deedaye Yaqoob Me
Phir Palat Aayi Baseerath Phir Se Beenayi Mili.

Behre Ishqe Mustafa Ka Maajra Ho Kya Bayaan
Lutf Aaya Doobne Ka Jitni Gehrayi Mili.

Chadare Zahra Ka Saaya Hai Mere Sar Par Naseer
Faize Nisbath Dekhiye Nisbath Bhi Zehrayi Mili.