Ye Sab Tumhara Karam Hai Aaqa

Kalaam of Khalid Mehmood Khalid Sahab

Koi Saleeqa Hai Aarzu Ka
Na Bandagi Meri Bandagi Hai
Ye Sab Tumhara Karam Hai Aaqa
Ke Baat Ab Tak Bani Hui Hai.

Kisi Ka Ehsan Kyun Uthayen
Kisi Ko Halaath Kyun Batayen
Tumhi Se Maangen Ge Tumhi Do Ge
Tumhare Dar Se Hi Lau Lagi Hai.

Tajalliyon Ke Kafeel Tum Ho
Murade Qalbe Khaleel Tum Ho
Khuda Ki Raushan Daleel Tum Ho
Ye Sab Tumhari Hi Raushni Hai.

Tumhi Ho Roohe Rawaane Hasti
Sukoon Nazar Ka Dilon Ki Masti
Hai Do Jahan Ki Bahaar Tumse
Tumhi Se Phoolon Me Taazgi Hai.

Shaoor -O- Fikr -O- Nazar Ke Daawe
Had -E- Ta'aiyyun Se Badh Na Paaye
Na Choosake Un Bulandiyon Ko
Jahan Muqaame Muhammadi Hai.

Nazar Nazar Rehmate Sarapa
Adaa Adaa Ghairath -E- Maseeha
Zameer -E- Murda Bhi Jee Uthe Hain
Jidhar Tumhari Nazar Uthi Hai.

Amal Ki Mere Asaas Kya Hai
Bajuz Nadamat Ke Paas Kya Hai
Rahe Salamath Tumhari Nisbath
Mera To Ek Aasra Yehi Hai.

Ataa Kiya Mujhko Darde Ulfath
Kahan Thi Ye Pur Khata Ki Qismath
Mai Iss Karam Ke Kahan Tha Qabil
Huzoor Ki Banda Parwari Hai.

Unhi Ke Dar Se Khuda Mila Hai
Unhi Se Uska Pata Chala Hai
Wo Aayina Jo Khuda Numa Hai
Jamaale Husne Huzoor Hi Hai.

Basheer Kahiye Nazeer Kahiye
Unhe Siraaje Muneer Kahiye
Jo Sar Ba Sar Hai Kalaame Rabbi
Wo Mere Aaqa Ki Zindagi Hai.

Sanaye Mehboobe Haq Ke Qurban
Suroore Jaan Ka Yehi Hai Unwaan
Har Ek Masti Fanaa Bad Aamaan
Ye Kaif Hi Kaife Sarmadi Hai.

Ham Apne Aamaal Jaante Hain
Ham Apni Nisbath Se Kuch Nahi Hain
Tumhare Dar Ki Azeem Nisbath
Mataaye Azmath Bani Hui Hai.

Hai Kaaba Bhi Marja -E- Khalaaiq
Bohot Numayan Hai Ye Haqaaiq
Magar Jo Maqsood -E- Aashiqi Hai
Huzoor Ke Dar Ki Haazri Hai.

Yehi Hai Khalid Asaase Rehmath
Yehi Hai Khalid Binaye Azmath
Nabi Ka Irfan Zindagi Hai
Nabi Ka Irfan Bandagi Hai.