Taskeene Dile Sayyade Sadaat Khadija

Taskeene Dile Sayyade Sadaat Khadija

Taskeene Dile Sayyade Sadaat Khadija
Allah Ka Ehsan Teri Zaat Khadija.

Hoon Muntazir -E- Chashme Inayaath Khadija
Miljaye Tere Lutf Ki Khairath Khadija.

Pohonchi Teri Daulat Se Kamak Deene Nabi Ko
Mushkil The Jab Islam Pe Halaath Khadija.

Phaila Teri Nusrath Ke Sabab Haq Ka Ujaala
Baatil Ko Tere Dam Se Hui Maath Khadija

Mamdooh Nabataat -O- Jamadaat Bhi Tere
Mamnoon Tere Arzo Samawaat Khadija.

The Tere Liye Zeest Ke Aiyyam Ka Haasil
Sarkar Ki Qidmat Ke Wo Lamhaat Khadija.

Hojati Thi Nam Aankh Shahe Deen Ki Tere Baad
Yaad Aati Thi Jab Koi Teri Baat Khadija.

Likh Paaun Teri Azmath -O- Rif'ath Ka Qaseeda
Mai Kya Hoon Bhala Kya Meri Auqaat Khadija.

Ye Pukhta -O- Mazboot Ta'alluq Tere Dar Se
Mujhko To Hai Kaunain Ki Saughaat Khadija.

Pabande Ghame Dahr Hoon Aye Maadare Mushfiq
Barse Tere Ikraam Ki Khairaat Khadija.

Aarif Bhi Hai Adna Sa Tera Shaair -E- Darbaar
Maqbool Hon Iske Bhi Ye Jazbaat Khadija.