Phir Aagaya Ashra -E- Muharram

Kalaam of Layeeq

Phir Aagaya Ashra -E- Muharram
Hussain Phir Yaad Aarahe Hain
Jo Unpe Qurban Hai Jaan -O- Dil Se
Phir Unpe Aansu Baha Rahe Hain.

Wohi To Hain Markaze Muhabbat
Ke Unse Hai Hamko Rabt -O- Nisbath
Wohi Hamara Waseela Bankar
Shareek -E- Daste Dua Rahe Hain.

Wo Sibte Khairul Wara Jo Thaire
Wo Ibne Mushkil Kusha Jo Thaire
Maqaam -E- Hairath Hi Kya Agar Wo
Hamari Bigdi Bana Rahe Hain.

Fidaiyath Ki Misaal Bankar
Chale Hain Jo Saath Leke Paani
Kata Ke Wo Apne Dast -O- Baazu
Wafa Ke Jauhar Dikha Rahe Hain.

Nayi Nayi Aazmaishein Hain
Naye Naye Imtehaan Har Dam
Jo Banda -E- Haq Rahe Hamesha
Qadam Qadam Mubtala Rahe Hain.

Jahan Ke Dhoke Me Aane Waalon
Jahan Ki Tareeq Saamne Hai
Wafa Zamane Ne Kis Se Ki Hai
Ye Kis Se Ham Dil Laga Rahe Hain.

Nigah Padhte Hi Jis Pe Khud Jee
Durood Padhne Ko Chaahta Hai
Wo Aaj Hamshakle Mustafa Bhi
To Ran Se Jannat Ko Jarahe Hain.

Ajab Nahi Aaj Ke Liye Hi
Zabaan Chusaayi Thi Mustafa Ne
Hussain Masoom Tishna Lab Ko
Zabaan Jo Apni Chusarahe Hain.

Wo Haath Jinko Nabi Ne Chooma
Wo Haath Jin Par Bike Hazaaron
Bataun Kya Karbala Me Aakar
Wo Kiska Laasha Utha Rahe Hain.

Ye Jiski Nisbath Se Zindagi Hai
Azal Se Ab Tak Layeeq Apni
Ussi Ke Dar Par Pade Hue Hain
Wahin To Ham Sar Jhuka Rahe Hain.