Kursi Par Koi Bhi Baithe Raja To Mera Khwaja Hai

Uske Karam Ke Sab Hain Bhikari
Kya Raja Maharaja Hai
Kursi Par Koi Bhi Baithe
Raja To Mera Khwaja Hai.

Haidar Ka Laadla Hai Wo Zahra Ka Laal Hai
Beshak Mera Moin Muhammad Ki Aal Hai
Deewanon Ko Kis Baat Ka Aaqir Malaal Hai
Raja Ko Apni Parja Ka Poora Khayaal Hai.

Har Aankh Chahti Hai Ziyarath Moin Ki
Har Dil Me Bas Gayi Hai Muhabbat Moin Ki
Iss Sar Zameene Hind Ke Shahon Ne Kehdiya
Mehshar Talak Rahegi Hukoomat Moin Ki.

Ham Ghareebon Ki Sadaon Ne Bulaya Hai Tujhe
Hind Ka Shaah Muhammad Ne Banaya Hai Tujhe
Kaise Aayega Koi Harf Hukumat Pe Teri
Panjatan Paak Ne Kursi Pe Bithaya Hai Tujhe.

Pyaara Hai Hasnain Ka Beshak Nabi Ki Aal Hai
Sanjar Waala Peer Mera Sayyada Ka Laal Hai
Mast Hai Mastan Hai Har Haal Me Khush Haal Hai
Chishtiya Daman Ko Jo Pakda Wo Malamaal Hai.

Tu Darbadar Ki Thokaren Ek Baar Khaake Dekh
Milta Hai Kya Kisi Se Zara Aazmake Dekh
Tu Jin Se Mil Raha Hai Ye Saare Ghulam Hain
Raja Ko Dekhna Hai To Ajmer Jaake Dekh.