Thi Jiske Muqaddar Me Gadayi Tere Dar Ki

Kalaam of Peer Naseer Uddin Naseer

Thi Jiske Muqaddar Me Gadayi Tere Dar Ki
Qudrath Ne Use Raah Dikhayi Tere Dar Ki.

Har Waqt Hai Ab Jalwa Numayi Tere Dar Ki
Tasweer Hi Dil Me Utar Aayi Tere Dar Ki.

Hai Arzo Samawaat Teri Zaat Ka Sadqa
Mohtaaj Hai Ye Saari Khudayi Tere Dar Ki.

Anwaar Hi Anwaar Ka Aalam Nazar Aaya
Chilman Jo Zara Maine Uthayi Tere Dar Ki.

Mashrab Hai Mera Teri Talab Tera Tasawwur
Maslak Hai Mera Sirf Gadayi Tere Dar Ki.

Dar Se Tere Allah Ka Dar Hamko Mila Hai
Iss Aouj Ka Baais Hai Rasayi Tere Dar Ki.

Ek Naimate Uzma Se Wo Mehroom Raha Hai
Jis Shaqs Ne Khairaat Na Paayi Tere Dar Ki.

Mai Bhool Gaya Naqsh -O- Nigaare Rukhe Duniya
Surath Jo Mere Saamne Aayi Tere Dar Ki.

Taa Zeest Tere Dar Se Mera Sar Na Uthega
Marjaun To Mumkin Hai Judayi Tere Dar Ki.

Phir Usne Koi Aur Tasawwur Nahi Baandha
Hamne Jise Tasweer Dikhayi Tere Dar Ki.

Hai Mere Liye To Yehi Meraj -E- Ibadath
Haasil Hai Mujhe Naasiya Saayi Tere Dar Ki.

Aaya Hai Naseer Aaj Tamanna Yehi Lekar
Palkon Se Kiye Jaaye Safayi Tere Dar Ki.