Noore Haq Sahibe Quran Rasoole Arabi

Kalaam of Hz Zaki R.a

Noore Haq Sahibe Quran Rasoole Arabi
Zeenath -E- Wajibo Imkaan Rasoole Arabi.

Tum Mere Zikr Ki Ho Jaan Rasoole Arabi
Rif'at -E- Fikr Ki Ho Shaan Rasoole Arabi.

Aapke Aariz -O- Gesu Ka Hai Ek Akse Lateef
Subha Aur Shaam Ka Dauran Rasoole Arabi.

Kiske Nalain Sare Arshe Mo'alla Pohonche
Kaun Hai Aapsa Zeeshan Rasoole Arabi.

Usse Phir Jaati Hai Khud Khaliqe Aalam Ki Nazar
Jis Se Tum Hogaye Anjaan Rasoole Arabi.

Aapke Noor Ka Sadqa Hai Ye Saari Taqleeq
Zarre Zarre Pe Hai Ehsaan Rasoole Arabi.

Qaaba Qausain Pe Sidrah Se Jo Tanha Pohonche
Hain Malak Dekhke Hairaan Rasoole Arabi.

Aapka Jalwa -E- Zeba Ho Meri Peshe Nazar
Nikle Jab Tan Se Meri Jaan Rasoole Arabi.

Heef Sad Heef Abu Jahl Ki Bad Bakhti Par
Aye Khusha Qismat -E- Salman Rasoole Arabi.

Ambiya Hon Ke Hon Abdaal Qutub Hon Ya Ghouse
Sab Me Hai Aapka Faizan Rasoole Arabi.

Aapki Apne Zaki Par Hai Jo Rehmath Ki Nazar
Wo Na Bhoolega Ye Ehsaan Rasoole Arabi.