Nabi Ki Marifath Beshak Dare Haidar Se Milti Hai

Kalaam of Aouj Yaqubi

Nabi Ki Marifath Beshak Dare Haidar Se Milti Hai
Ye Daulat Jiske Ghar Ki Hai Usi Ke Ghar Se Milti Hai.

Muhammad Ki Muhabbat Aise Waise Ghar Se Milti Hai
Ye Daulat Bhi Kahin Kya Be Talab Be Tar Se Milti Hai.

Naseeb -E- Ahle Nisbath Se Nabi Ke Ishq Ki Manzil
Magar Zahid Ko Ye Nisbath Bade Chakkar Se Milti Hai.

Farishton Aao Poocho Mujhse Mai Peshi Me Rehta Hoon
Hai Malik Ghar Ka Kaisa Ye Khabar Naukar Se Milti Hai.

Padhane Aaye Ho Jibreel Iqra Ka Sabaq Kisko
Farishton Ko Bhi Khud Taleem Jiske Ghar Se Milti Hai.

Jahan Jaakar Wilayath Jazb Hoti Hai Imamat Me
Meri Nisbath Wahan Jaakar Nabi Ke Ghar Se Milti Hai.

Qadam Bosi Ko Badhti Hai Adab Se Bekhudi Fauran
Meri Pyaasi Nazar Jab Saqiye Kausar Se Milti Hai.

Tumhari Raaye Iss Baare Me Kya Hai Hazrate Moosa
Madine Ki Tajalli Toor Ke Manzar Se Milti Hai.

Jinhe Hai Naaze Taqwa Daaware Mehshar Se Milte Hain
Gunahon Ki Nadamath Shafiye Mehshar Se Milti Hai.

Samajhme Aaraha Hai Raaz Kuch Al Faqre Fakhri Ka
Jo Tafseeli Ataa "A'tayka Al Kausar" Se Milti Hai.

Likhi Hai Aaina "Fee Ahsani Taqweem" Chehre Par
Mere Aaqa Ki Surat Saaf Surat Gar Se Milti Hai.

Wo Dar Misle Sifath Zaate Nabi Se Ghair Mutfik Hai
Mataaye Ilm Shehre Ilm Ke Jis Dar Se Milti Hai.

Machalte Hain Adab Se Jinke Sar Me Be Jabeen Sajde
Rasoolallah Ki Chaukhat Unhi Ke Sar Se Milti Hai.

Ba Andaze Tariqat Kuch Khabar Khaaim Maqami Ki
Shabe Hijrath Rasoolallah Ke Bistar Se Milti Hai.

Azal Se Aana Jaana Hai Mera Sarkar Ke Ghar Me
Mere Dil Ki Gali Sarkar Hi Ke Ghar Se Milti Hai.

"Bi Iznillah" "Bi Izni" Kehne Waale Bhi Samajhte Hain
Hayaate Jaavedani Aapki Thokar Se Milti Hai.

Farazdaq Hon Qameeri Hassan Hon Ya Aouj Yaqoobi
Ijazat Naat Ki Sab Ko Nabi Ke Ghar Se Milti Hai.