Bhardo Jholi Meri Ya Muhammad

Kalaam of Purnam Allahabadi

Tumhare Aastane Se Zamana Kya Nahi Paata
Koi Bhi Dar Se Khali Maangne Waala Nahi Jaata.

Bhardo Jholi Meri Ya Muhammad
Laut Kar Mai Na Jaaunga Khaali
Kuch Nawason Ka Sadqa Ataa Ho
Dar Pe Aaya Hoon Bankar Sawaali.

Gira....
Tum Zamane Ke Muqthar Ho Ya Nabi
Bekason Ke Madadgar Ho Ya Nabi
Sab Ki Sunte Ho Apne Ho Ya Ghair Ho
Tum Ghareebon Ke Gham Khwar Ho.

Ham Hain Ranjo Museebat Ke Maare Hue
Saqt Mushkil Me Hain Gham Se Haare Hue
Ya Nabi Kuch Khudara Hame Bheek Do
Dar Pe Aaye Hain Jholi Pasaare Hue Hain.

Hai Mukhalif Zamana Khidar Jaaye Ham
Halat -E- Bekasi Kisko Dikhlayen Ham
Ham Tumhare Bhikaari Hain Ya Mustafa
Kiske Aage Bhala Haath Phailayen Ham.

Jo Ibne Murtaza Ne Kiya Kaam Khoob Hai
Qurbani -E- Hussain Ka Anjaam Khoob Hai
Qurban Hoke Fatima Zahra Ke Chain Ne
Deene Khuda Ki Shaan Badhayi Hussain Ne
Baqshi Hai Jisne Mazhabe Islam Ko Hayaath
Kitni Azeem Hazrate Shabbir Ki Hai Zaat
Maidane Karbala Me Shahe Khush Khisaal Ne
Sajde Me Sar Kata Ke Muhammad Ke Laal Ne

Sher...
Zindagi Baqshdi Bandagi Ko
Aabru Deene Haq Ki Bachali
Wo Muhammad Ka Pyara Nawasa
Jisne Sajde Me Gardan Kataali.

Aashiqe Mustafa Ki Azaan Me
Allah Allah Kitna Asar Tha
Arsh Waale Bhi Sunte The Jisko
Kya Azaan Thi Azaane Bilaali.

Gira...
Saccha Ye Waqiya Hai Azaane Bilaal Ka
Ek Din Rasoole Paak Se Logon Ne Yoon Kaha
Ya Mustafa Azaan Ghalat Dete Hain Bilaal
Kahiye Huzoor Aapka Isme Hai Kya Khayaal
Farmaya Mustafa Ne Ye Sach Hai To Dekhiye
Waqt -E- Sahar Ki Aaj Azaan Aur Koi De

Hazrath Bilal Ne Jo Azaane Sahar Na Di
Khudrat Khuda Ki Dekho Na Mutlaq Sahar Hui
Aaye Nabi Ke Paas Phir Ashaabe Basafa
Ki Arz Mustafa Se Ke Ya Shahe Ambiya
Hai Kya Sabab Sehar Na Hui Aaj Mustafa
Jibreel Laaye Aise Me Paighame Kibriya
Pehle To Mustafa Ko Adab Se Kiya Salaam
Baad-Az Salaam Unko Khuda Ka Diya Payaam

Ye Jibraeel Ne Kaha Khairul Anaam Se
Allah Ko Hai Pyaar Tumhare Ghulaam Se
Farmaraha Hai Aapse Ye Rabbe Zuljalaal
Hogi Na Subah Denge Na Jab Tak Azaan Bilaal

Sher...
Haq Se Paayi Wo Shaane Kareemi
Marhaba Dono Aalam Ke Waali
Uski Qismat Ka Chamka Sitara
Jispe Nazre Karam Tumne Daali.

Hashr Me Unko Dekhenge Jis Dam
Ummati Ye Kahenge Khushi Se
Aarahe Hain Wo Dekho Muhammad
Jiske Kaandhe Pe Kamli Hai Kaali.

Kaash Purnam Dayaare Nabi Me
Jeete Jee Ho Bulawa Kisi Din
Haale Dil Mustafa Ko Sunaun.
Thaam Kar Unke Rauze Ki Jaali.