Mangte Hain Tere Dar Ke Khairaat Ataa Karna

Kalaam of Hazrath Saqib Raza Mustafai Sahab

Mangte Hain Tere Dar Ke Khairaat Ataa Karna
Aaqa Teri Aadat Hai Mangton Ko Diya Karna.

Shaahon Ki Madha Khwani Hamse To Nahi Mumkin
Apna To Wazifa Hai Aaqa Ki Sana Karna.

Mai Door Hoon Taiba Se Dardon Ne Mujhe Maara
Tum Mere Maseeha Ho Dardon Ki Dawa Karna.

Iss Baar Madine Me Aye Kaash Ke Mai Pohonchun
Manzoor Khuda Ab To Dukhiye Ki Dua Karna.

Mai Apni Khataon Pe Sharminda Hoon Naadim Hoon
Tum Rehmate Aalam Ho Har Maaf Khata Karna.

Bu Bakr Ne Batlaaya Sab Ahle Zamana Ko
Dildaar Ke Qadmon Me Gharbaar Fida Karna.

Hamne To Raza Saqib Aadat Si Banaali Hai
Sab Ranjo Alam Apne Aaqa Ko Kaha Karna.