Allah Ahle Baite Payambar Ke Saath Hai

Kalaam of Peer Naseer Uddin Naseer

Allah Ahle Baite Payambar Ke Saath Hai
Islam Ka Waqar Issi Ghar Ke Saath Hai.

Jo Shaqs Noore Deedaye Haidar Ke Saath Hai
Rauze Jaza Wo Shafiye Mehshar Ke Saath Hai.

Pyaase Na Ham Rahenge Qayamath Me Dekhna
Apna Bhi Rabt Saaqiye Kausar Ke Saath Hai.

Rehta Hai Raat Din Ghame Zurriyyate Rasool
Sauda Shurooh Se Ye Mere Ghar Ke Saath Hai.

Aale Nabi Ko Zaate Nabi Se Juda Na Jaan
Har Mauj Ka Wujood Samandar Ke Saath Hai.

Wo Ek Makaan Ke Jiska Makeen Baabe Ilm Tha
Apna To Raabta Hi Ussi Ghar Ke Saath hai.

Aale Nabi Ke Dard Se Mai Bhi Juda Nahi
Mera Naseeb Unke Muqaddar Ke Saath Hai.

Laakhon Shaqi Udhar Hai Idhar Ek Hussain Hai
Kaanton Ki Nok Jhok Gule Tar Ke Saath Hai.

Kis Par Khulega Muarkaye Karbala Ka Raaz
Ye Wo Muamla Hai Jo Daawar Ke Saaath Hai.

Tanha Usi Ke Naam Se Dushman Tha Bad Hawaas
Ab Kya Karen Hussain Bahattar Ke Saath Hai.

Sach Much Ho Dil Me Gham To Bhar Aati Hai Aankh Bhi
Ashkon Ka Silsila Dile Muztar Ke Saath Hai.

Uss Zaat -E- Paak Ka Hoon Dilo Jaan Se Mai Ghulam
Daawa Ghalat Nahi Hai Magar Dar Ke Saath Hai.

Dushman Ki Guftagu Me Kahan Khair Ki Jhalak
Jo Baat Hai Shareer Ki Ek Shar Ke Saath Hai.

Bhejun Yazeediyath Pe Na Kyun Laanat Aye Naseer
Ye Dushmani Hai Aur Mere Ghar Ke Saath Hai.