Mangte Khaali Haath Na Laute

Kalaam of Khalid Mehmood Khalid Sahab

Mangte Khaali Haath Na Laute
Kitni Mili Khairat Na Poocho
Unka Karam Phir Unka Karam Hai
Unke Karam Ki Baat Na Poocho.

Kuntu Kanzan Raaze Mashiyyath
Jalwaye Asra Noore Hidayath
Jagmag Jagmag Dono Aalam
Kaisi Hai Wo Zaat Na Poocho.

Ishqe Nabi Kaunain Ki Daulat
Ishqe Nabi Baqshish Ki Zamanat
Isse Badhkar Daste Talab Me
Hai Bhi Koi Saughaat Na Poocho.

Rashke Jinaan Taiba Ki Galiyan
Har Zarra Firdause Bad Aaman
Charon Taraf Anwaar Aalam
Rehmath Ki Barsaat Na Poocho.

Zaahir Me Taskeen -E- Dilo Jaan
Baatin Me Meraj -E- Dilo Jaan
Naame Nabi Phir Naame Nabi Hai
Naame Nabi Ki Baat Na Poocho.

Haal Agar Kuch Apne Sunaya
Unke Karam Ka Shikwa Hoga
Mai Apne Halaat Me Khush Hoon
Mujhse Mere Halaat Na Poocho.

Taaje Shafa'at Sar Par Pehne
Hashr Ka Dulha Aa Pohoncha Hai
Aankhen Kholo Ghour Se Dekho
Kiski Hai Baraat Na Poocho.

Mai Kya Aur Kya Meri Haqiqat
Sab Kuch Hai Sarkar Ki Nisbath
Mai To Bura Hoon Lekin Meri
Laaj Hai Kiske Haath Na Poocho.

Khalid Mai Sirf Itna Kahunga
Jaag Utha Askhon Ka Muqaddar
Ishqe Nabi Me Rote Rote
Kaise Kati Hai Raat Na Poocho.