Ye Dil Huzoor Pe Qurban Nahi To Kuch Bhi Nahi

Kalaam of Kamil

Ye Dil Huzoor Pe Qurban Nahi To Kuch Bhi Nahi
Zameer Pehle Musalman Nahi To Kuch Bhi Nahi.

Zubaan Se Laakh Kaho Laa Ilaha Illallah
Muhabbat -E- Shahe Zeeshan Nahi To Kuch Bhi Nahi.

Karam Talab Hai To Mahol Pehle Paida Kar
Ek Ishtiyaq -E- Farawaan Nahi To Kuch Bhi Nahi.

Junoon Nawaaz Hai Mafhoom Waz Zuhaa Wallaill
Nazar Me Maaniye Furqaan Nahi To Kuch Bhi Nahi.

Nazaara Kaun Kare Husne Zaate Wajib Ka
Wujoode Aalam -E- Imkaan Nahi To Kuch Bhi Nahi.

Nabi Se Ishq Hi Wallah Asl Imaan Hai
Hazaar Kuch Ho Jo Imaan Nahi To Kuch Bhi Nahi.

Nazar Mili Hai Faqat Deede Mustafa Ke Liye
Nigaah Jalwa Badamaan Nahi To Kuch Bhi Nahi.

Khuda Naseeb Kare Sab Ko Soze Ishqe Nabi
Ye Aag Dil Me Farozaan Nahi To Kuch Bhi Nahi.

Chale Hain Aap Ye Kiski Talaash Me Kamil
Khud Apne Aap Ka Irfaan Nahi To Kuch Bhi Nahi.