Zubaane Ishq Se Sharhe Sifaat

Kalaam of Muzaffar Warsi Sahab

Zubaane Ishq Se Sharhe Sifaat Phir Na Hui
Tamaam Umr Kahi Naat, Naat Phir Na Hui.

Ghareebe Fikr Hoon Aaqa Muaaf Kardije
Jo Baat Keh Na Saka Tha Wo Baat Phir Na Hui.

Isiliye To Muhammad Ke Naau Me Baitha
Kisi Bhanwar Kisi Toofan Se Maat Phir Na Hui.

Chala Huzoor Ki Aawaz Thaam Kar Jab Se
Mafahamat Kisi Laghzish Ke Saath Phir Na Hui.

Karam Ki Ek Nazar Bangaya Naseeb Mera
Ghame Zamana -O- Fikre Najaat Phir Na Hui.

Huzoor Ne Hame Shaista -E- Shaoor Kiya
Thi Jitni Pehle Pareshaan Hayaat Phir Na Hui.

Kuch Iss Tarha Mera Khairul Wara Tulu Hua
Yaqeen -O- Sidq Ke Aangan Me Raat Phir Na Hui.

Chadha Jo Roop Tha Sultane Husn Ke Hote
Muzaffar Itni Haseen Kayenaat Phir Na Hui.