Tadap Uth'ta Hai Dil Lafzon Me Dohrayi Nahi Jaati

Tadap Uth'ta Hai Dil Lafzon Me Dohrayi Nahi Jaati

Tadap Uth'ta Hai Dil Lafzon Me Dohrayi Nahi Jaati
Zubaan Par Karbala Ki Daastan Laayi Nahi Jaati.

Hussain Ibne Ali Ke Gham Me Hoon Duniya Se Begana
Hujoome Khalq Me Bhi Meri Tanhaayi Nahi Jaati.

Udaasi Charahi Hai Rooh Par Shaam -E- Ghareeban Ki
Tabiyat Hai Ke Behlaane Se Behlaayi Nahi Jaati.

Kaha Abbas Ne Afsos Baazu Kat Gaye Mere
Sakina Tak Ye Mashk -E- Aab Lejaayi Nahi Jaati.

Suna Hai Karbala Ki Khaak Hai Ikseer Se Badhkar
Ye Mitti Aankh Me Lene Se Binaayi Nahi Jaati.

Jatan Har Daur Me Kya Kya Na Ahle Shar Ne Kar Dekhe
Magar Zehra Ke Pyaron Ki Paziraayi Nahi Jaati.

Daleel Isse Ho Kya Badhkar Shaheedon Ki Taharat Par
Ke Maiyyat Dafn Ki Jaati Hai Nehlaayi Nahi Jaati.

Tamaache Maarlo Khaime Jalaalo Khaid Me Rakhlo
Ali Ke Gul Rukhon Se Booe Zehraayi Nahi Jaati.

Kaha Shabbir Ne Abbas Tum Mujhko Sahara Do
Ke Tanha Laashe Akbar Mujhse Dafnaayi Nahi Jaati.

Hussainiyyath Ko Paana Hai To Takkar Le Yazeedon Se
Ye Wo Manzil Hai Jo Lafzon Me Samjhayi Nahi Jaati.

Wo Jin Chehron Ko Zeenath Ghaaza -O- Khaake Najaf Baqshe
Dame Aakhir Bhi Un Chehron Ki Zebaayi Nahi Jaati.

Koi Bhi Door Ho To Hi Imaame Gham Theherta Hai
Ghame Shabbir Teri Shaane Yaktaayi Nahi Jaati.

Naseer Aakhir Adawath Ke Bhi Kuch Aadab Hote Hain
Kisi Beemar Ko Zanjeer Pehnaayi Nahi Jaati.