Muqamate Muhammad Ka Agar Izhar Hojaye

Kalaam of Aouj Yaqubi

Muqamate Muhammad Ka Agar Izhar Hojaye
Khirad Ki Aankh Lagjaye Junoon Bedaar Hojaye.

Do Aalam Ki Nazar Uski Nazar Se Jhuk Ke Milti Hai
Mere Aaqa Ke Qadmon Ka Jise Deedar Hojaye.

Muhammad Baa -E- Bismillah Ki Tafseer Hai Khud Hi
Yehi Nuqta Agar Phaile Khate Purkaar Hojaye.

Agar Sarkar Chehre Se Ulat Den Meem Ka Parda
Do Aalam Ka Har Ek Jalwa Pase Deewar Hojaye.

Utar Kar Toor Se Moosa Zara Aao Madine Me
Yahan Mumkin Hai Donon Ka Tumhe Deedar Hojaye.

Tu Deta Hai Sada Haq Ko Waseela Chor Kar Inka
Kahin Aisa Na Ho Zahid Ke Teri Haar Hojaye.

Agar Hamwaar Hojaye Teri Nisbath Muhammad Se
Khuda Tak Jaane Waala Raasta Hamwaar Hojaye.

Agar Sar Sajdaye Haq Me Ho Dil Aaqa Ke Qadmon me
Mera Zimma Hai Zahid Tera Beda Paar Hojaye.

Bhala Jibreel Ne Pehle Kahan Dekha Tha Ye Manzar
Ke Rehbar Raah Me Rehjaye Raahi Paar Hojaye.

Ghulame Ahmade Muqthar Kab Majboor Hota Hai
Adu Ki Simt Jab Uthi Nazar Talwaar Hojaye.

Na Ho Yaade Nabi Zaade Safar Me Aouj Agar Shamil
Har Ek Aasan se Aasan Raasta Dushwaar Hojaye.