Ab Meri Nigahon Me Jachta Nahi Koi

Kalaam of Khalid Mehmood Khalid Sahab

Ab Meri Nigahon Me Jachta Nahi Koi
Jaise Mere Sarkar Hain Waisa Nahi Koi.

Tumsa To Haseen Aankh Ne Dekha Nahi Koi
Ye Shaane Latafat Hai Ke Saaya Nahi Koi.

Aye Zarfe Nazar Dekh Magar Dekh Adab Se
Sarkar Ka Jalwa Hai Tamasha Nahi Koi.

Ye Tajurbe Imaan Hai Aye Rehmate Aalam
Fariyaad Tumhare Siwa Sunta Nahi Koi.

Ye Toor Se Kehti Hai Abhi Tak Shabe Meraj
Deedar Ki Taqat Ho To Parda Nahi Koi.

Wo Aankh Jo Roti Hai Ghame Ishqe Nabi Me
Uss Aankh Se Rooposh To Jalwa Nahi Koi.

Soncho To Kabhi Nisbate Rehmat Ke Nataaij
Tasleem Ke Ham Logon Me Accha Nahi Koi.

Bekaar Hai Har Waar Tera Gardishe Dauraan
Wo Hamdam -O- Ghamkhwaar Hain Tanha Nahi Koi.

Aizaaz Ye Haasil Hai To Haasil Hai Zameen Ko
Aflaak Pe To Gumbade Khazra Nahi Koi.

Hota Hai Jahan Zikr Muhammad Ke Karam Ka
Uss Bazm Me Mehroome Tamanna Nahi Koi.

Darmaane Gham -O- Dard Shifaaye Dile Bimaar
Juz Aapke Aye Jaane Maseeha Nahi Koi.

Sarkar Ki Rehmat Ne Magar Khoob Nawaza
Ye Sach Hai Ke Khalid Sa Nikamma Nahi Koi.