Mar Ke Apni Hi Adaon Pe Amar Hojaun

Kalaam of Muzaffar Warsi Sahab

Mar Ke Apni Hi Adaon Pe Amar Hojaun
Unki Dehleez Ke Qabil Mai Agar Hojaun.

Unki Raahon Pe Mujhe Itna Chalana Ya Rab
Ke Safar Karte Hue Garde Safar Hojaun.

Zindagi Ne To Samandar Me Mujhe Phenk Diya
Apni Mutthi Me Wo Lelein To Gauhar Hojaun.

Mera Mehboob Hai Wo Raahbare Kauno Makaan
Jiski Aahat Bhi Mai Sunloon To Khizar Hojaun.

Zarb Doon Khud Ko Jo Unse To Lagun Laa Tadaad
Wo Jo Mujhme Se Nikal Jaayein Sifar Hojaun.

Jo Pohonchti Rahe Un Tak Jo Rahe Mehwe Tawaaf
Aisi Awaaz Banun Aisi Nazar Ho Jaaun.

Iss Qadar Ishqe Nabi Ho Ke Mita Doon Khud Ko
Iss Qadar Khaufe Khuda Ho Ke Nidar Ho Jaaun.

Aarzu Ab To Muzaffar Jo Koi Hai To Ye Hai
Jitna Baaqi Hoon Madine Me Basar Ho Jaaun.