Mere Maula Mere Aaqa Shahe Mehboobe Subhani

Kalaam of Ameen

Mere Maula Mere Aaqa Shahe Mehboobe Subhani
Jahan Me Ho Nahi Sakta Tera Hamsar Koi Saani.

Na Duniya Ki Gharaz Mujhko Na Duniya Ki Koi Parwah
Ghulame Shaahe Jeelan Hoon Gadaaye Shaahe Jeelani.

Tere Darbar Ke Adna Ghulamon Ka Ye Rutba Hai
Salateen -E- Zaman Karte Hain Unke Dar Ki Darbani.

Ba Hukme Rab Qutub Abdaal Hain Taabe Hukum Tere
Kiya Karte Hain Jo Aqleem -E- Baatin Ki Hukumraani.

Murideen Laatakhaf Farmake Tu Ne Kardiya Saabit
Ke Tu Mehboobe Subhani Hai Al Haq Qutbe Rabbani.

Mujhe Duniya Ke Sheeroon Par Sharaf Rauze Azal Se Hai
Ke Hoon Adna Ghulame Bargaahe Shere Yazdaani.

Wo Qudrat Hai Tujhe Haasil Jise Chaahe Ataa Karde
Hukumat Khaisar -O- Faghfoor Ki Taqte Sulaimani.

Hui Aasan Har Mushkil Zaban Par Mere Jab aaya
Madad Ya Ghouse -E- Aazam Ya Mohiuddin Jeelani.

Ameen Ka Sar Hai Tera Dar Kisi Se Usko Kya Matlab
Use Kaafi Tere Dar Ka Sahara Shaahe Jeelani.