Aisa Koi Mehboob Na Hoga Na Kahin Hai

Kalaam of Aazam Chishti Sahab

Aisa Koi Mehboob Na Hoga Na Kahin Hai
Baitha Hai Chataayi Pe Magar Arsh Nasheen Hai.

Milta Nahi Kya Kya Do Jahan Ko Tere Dar Se
Ek Lafz Nahi Hai Ke Tere Lab Pe Nahi Hai.

Hai Tere Sana Khwanon Me Mursal Bhi Nabi Bhi
Kaunain Tere Zere Asar Zere Nageen Hai.

Tu Chaahe To Har Shab Ho Misaale Shabe Asra
Tere Liye Do Chaar Qadam Arshe Bareen Hai.

Har Ek Ko Mayassar Kahan Uss Dar Ki Ghulami
Uss Dar Ka To Darbaan Bhi Jibreele Ameen Hai.

Rukte Hain Yahin Aake Qadam Ahle Nazar Ke
Iss Koonche Se Aage Na Zamaan Hai Na Zameen Hai.

Aye Shaahe Zaman Ab To Ziyarath Ka Sharaf De
Be Chain Hain Aankhein Meri Be Taab Jabeen Hai.

Dil Girya Kunaan Aur Nazar Sooe Madina
Aazam Tera Andaaze Talab Kitna Haseen Hai.